बागलुङ, ८ असोज । जिल्ला प्रशासन कार्यालय बागलुङको परिसरबाट गोलीमा प्रयोग हुने सिसा चोरी भएको छ । लामो समयदेखि भण्डार गरेर राखिएको आठ क्विन्टल बराबरको सिसा चोरी भएको सहायक प्रमुख जिल्ला अधिकारी काशीराम शर्माले बताउनुभयो ।
उक्त सिसा किन र कहिलेदेखि भण्डारण गरिएको भन्ने विषयमा कुनै जानकारी नभएको सहायक प्रजिअ शर्माले बताउनुभयो । प्रशासन कार्यलयकै आडमा रहेको मन्दिरमा राखिएको सिसा हराएको सोमबारमात्र थाहा भएको हो । वषौर्ंदेखि भण्डार गरेर राखिएको सिसा चोरी भएपछि प्रहरीले खोजी सुरु गरेको छ ।
गोलीमा प्रयोग हुने सिसा चोरी भएपछि प्रशासन कार्यालयभित्रको सुरक्षा व्यवस्थामा प्रश्न उब्जिएको छ । जिल्लामा अञ्चलाधीश रहेका बेलामा सिसा भण्डार गरेर राखिएको थाहा भएको प्रहरी नायब उपरीक्षक कृष्ण सिवाकोटीले बताउनुभयो ।
भण्डारण गरेर राखिएको सिसाको विषयमा प्रहरी, प्रशासन कसैलाई कुनै जानकारी नभएपछि खोजी कार्यमा पनि समस्या भएको श्री सिवाकोटीले बताउनुभयो । पञ्चायतकालमा हालको जिल्ला प्रशासन कार्यालयमा अञ्चलाधीश कार्यालय रहेकाले सोही बेलादेखि सिसा भण्डारण गरेर राखिएको हुन सक्ने प्रहरीको अनुमान छ ।
मन्दिरको झ्यालमा रहेका रड काटेर सिसा चोरी भएको प्रशासन कार्यालयले जनाएको छ । एकैपटक नभइ पटकपटक चोरी भएको वा मिलोमतोमा बिक्री गरिएको हुन सक्ने अनुमान गरेर जिल्लाका नाकामा जानकारी गराएको प्रहरीले जनाएको छ । हराएको सिसा कस्तो र कति थियो भन्ने समेत यकिन भएको छैन । रासस
No comments:
Post a Comment
radijaljalanews@gmail.com