जुम्लाको स्याउ बजारमा भित्रिएपछि उपभोक्ता सस्तोमा पाउन थाले

राष्ट्रिय समाचार Radio Jaljala FM

बाँके, भदौ ३० । भारतीय स्याउ महंगोमा किन्न बाध्य उपभोक्ताहरु जुम्लाको स्याउ बजारमा भित्रिएपछि आधा सस्तोमा पाउन थालेका छन् । एकहप्ता अघिसम्म प्रतिकिलो १५०  रुपैयासम्म भारतीय स्याउ किन्दै आएका उपभोक्ताहरु अहिले जुम्लाको स्याउ प्रतिकिलो ८० रुपैयामा पाउन थालेका छन् । कोहलपुरका फलफुल व्यवसायी धुव्र अधिकारीका अनुसार भारतीय स्याउको मूल्य एक सय ४० रुपैयादेखि १५० प्रतिकिलो छ,  भने जुम्लाको स्याउको मुल्य ७० रुपैया प्रतिकिलोमा पाईन्छ । अधिकारीका अनुसार एकसाता देखि बाके जिल्लामा जुम्लाको स्याउ भित्रिएको हो । स्वेदेशी  जुम्लाको स्याउ बजारमा सस्तोमा पाउन थालेपछि भारतीय स्याउको ब्यापार घटेको  छ । जुम्लाको स्याउ भित्रिएपछि मंहगो किन्नुपर्ने बाध्यता पनि टरेको छ ।  कोहलपुरकी फलफुल व्यवसायी सावित्री भण्डारी भन्नुहुन्छ अहिले जुम्लाको स्याउ  सस्तो र खानलाई स्वादिलो हुदा व्यापार राम्रो छ । भारतीय स्याउ १४० रुपैया प्रतिकिलो विक्री गर्दै आउनुभएकी भण्डारी अहिले जुम्लाको स्याउ प्रतिकिलो ८०  रुपैया सम्म बिक्री गर्नुहुन्छ । जुम्लाको स्याउ भित्रिएपछि अहिले फलफुल विक्रेताका ठेला र पसलमा जुम्लाको स्याउन प्रसस्त विक्रिमा राखेको देखिन्छ ।