सम्मेलनको तयारी पूरा

राप्ती समाचार Radio Jaljala FM

दाङ, भदौ २५ । क्रान्तिकारी पत्रकार संघ, नेपाल दाङको भोलि घोराहीमा हुन लागिरहेको दोस्रो जिल्ला सम्मेलनको सम्पूर्ण तयारी पूरा भएको छ । सम्मेलन आयोजक समितिका संयोजक गणेश ओलीले आज एक विज्ञप्ती जारी गरी सम्मेलनको सबै तयारी पूरा भएको जनाउनुभएको छ ।
भोलि बिहान ११ बजे हुने सम्मेलनको उद्घाटन एकीकृत नेकपा माओवादीका संगठन विभाग प्रमुख तथा पूर्व उपप्रधान, गृह तथा सञ्चारमन्त्री कृष्णबहादुर महराले गर्नुहुने कार्यक्रम रहेको छ । सम्मेलनका लागि महरालगायत संघका प्रथम राष्ट्रिय सम्मेलन आयोजक समितिका संयोजक गोविन्द आचार्य र सचिवालय सदस्य सचिन रोका आज साँझ नै दाङ आइपुग्ने कार्यक्रम रहेको विज्ञप्तीमा उल्लेख गरिएको छ ।
विज्ञप्तीअनुसार सम्मेलनको मूल नारा अग्रगामी राज्य पुनःर्संरचनासहितको संविधानका लागि हाम्रो आन्दोलन, प्रेस स्वतन्त्रता र श्रमजीवि पत्रको पक्षमा दोस्रो जिल्ला सम्मेलन तय गरिएको पनि जनाइएको छ । साथै सम्मेलनलाई सफल बनाउन सहयोग गरिदिन र सम्मेलनको उद्घाटन सत्रमा सहभागी भइदिन सबैलाई आग्रह गरिएको छ ।