निमुसंगम घर्ती
२२ भदौ, दाङ । दाङमा साढे सात सय ग्राम ब्राउन सुगरसहित दुई युवक पक्राउ परेका छन् । इलाका प्रहरी कार्यालयवाट गएको प्रहरीको टोलीले उनीहरुलाई उरहरी-४, जसपुरवाट पक्राउ गरी शुक्रवार सार्वजनिक गरेको हो । वा ४८ प ५६३८ नम्बरको पल्सर मोटरसाइकलमा सवार उनीहरुलाई चेकजाँचका क्रममा पक्राउ गरीएको प्रहरीले जनाएको छ । पक्राउ पर्नेमा तुलसीपुर नगरपालिका-५, न्युरोड बस्ने किरण परियार र नेपालगंज १० घर भई हाल तुलसीपुर नगरपालिका-५, प्रगतिशिल टोल बस्दै आएका सम्मिम कुरेसी रहेको इलाका प्रहरी कार्यालय तुलसिपुरले जनाएको छ ।
अभियुक्त मध्यका सम्मिम कुरेसीले रुपैडियाबाट साढे ७ हजारमा ब्राउन सुगर किनेको र मोटरसाइकल किरण परियारको भएको प्रहरी समक्ष बयान दिएका छन् । मोटरसाइकलको अगाडिको भागमा सलाईको बट्टामा प्लास्टिकले बाधेर लुकाई छिपाई ल्याउनेक्रममा प्रहरीले पक्राउ गरेको थियो । पत्रकार सम्मेलनमा इलाका प्रहरी कार्यालय तुलसीपुरका प्रहरी निरिक्षक मदन कुमार थापाले जिल्ला अदालतबाट म्याद थप गरी अनुसन्धान प्रकृया अगाडी बढाउने जानकारी दिनुभयो ।
पक्राउ परेकाहरुलाई लागुऔषध निबारण ऐन २०३३ को परिच्छेद ३ को सजाय र दफा ६ बमोजिम कारबाही हुने उहाँले बताउनुभयो । नेपालमा २५ ग्राम सम्म लागु औषध बोक्नेलाई १० देखि १५ बर्षसम्म कैद र ५ हजार देखि २५ हजार रुपैंयाँसम्म जरिमाना हुने कानुनी ब्यवस्था छ ।
No comments:
Post a Comment
radijaljalanews@gmail.com