२४ भदौ, काठमाडौं । अघिल्लो हप्ता दुईचार दिनसम्म दलहरुको गतिबिधि हेर्दा लौ अब छिटै सहमति हुने भयो भन्ने सबैलाई लागेको थियो । अब कहीँकतै ध्यान नदिइकन दिनहुँ छलफल गर्ने नेताहरुले बताए । संविधानसभा पुनस्र्थापना या नयाँ चुनावमध्ये एउटा बाटो रोजेर राजनीतिक निकास दिने उनीहरुको भनाई थियो । यसअनुसार संविधानका विवादित विषयमा उनीहरुले छलफल थाले । संघीयताको विषयमा छलफल केन्द्रित रहृयो । तर दुईचार दिन लगातारजसो छलफल गरेका नेताहरु एक हप्ता हुँदासम्म फेरि जमघट भएका छैनन् ।
‘एमाले अध्यक्ष झलनाथ खनाल बिरामी भएको र कांग्रेस नेताहरु आन्तरिक काममा व्यस्त भएकाले छलफल हुन नसकेको हो’ एकीकृत नेकपा माओवादीका प्रवक्ता अग्नी सापकोटाले भन्नुभयो -’दलहरुबीचको छलफलले छिटै निरन्तरता पाउनेछ ।’ तर आन्तरिक कामले जिल्लामा रहेका कांग्रेसका शीर्ष नेताहरु अझै राजधानी फर्किएका छैनन् । बिरामी भएका एमाले अध्यक्ष खनाल तंगि्रएर हिँड्न थालेपछि पार्टीको आन्तरिक काममै व्यस्त हुनुहुन्छ । माओवादीका शीर्ष नेताहरु पनि पार्टी कामकै सिलसिलामा बाहिरफेर गरिरहेका छन् । अझ प्रचण्डले त आफूले भदौ मसान्तसम्म सहमति गर्न छलफल अगाडि बढाएपनि कांग्रेस र एमालेका कारण सम्भव नभएको बताउनुभएको छ । कांग्रेस र एमालेका नेताहरुले पनि माओवादीका कारण सहमति हुन नसकेको पुरानै अडान दोहोर्याइरहेका छन् ।
भदौ मसान्तसम्म सहमति गर्छौं भनेर नेताहरुले भनेपनि राजनीतिको गाँठो जस्ताको तस्तै छ । संघीयताको मुद्दा नसल्टिएसम्म गतिरोध अन्त्य हुने सम्भावना पनि छैन ।
विवाद उस्तै
संविधानसभा पुनस्र्थापना या नयाँ चुनाव मध्ये एउटा विकल्प रोज्नुपर्नेमा दलहरु सहमत छन् । चुनावभन्दा पहिले पुनस्र्थापना हुनुपर्छ भन्नेको संख्या थपिँदो छ । पहिले पुनस्र्थापनाको विषयमा मुख खोल्न नसकेका कांग्रेस सभापति सुशील कोइराला र एमाले अध्यक्ष झलनाथ खनालले समेत पुनस्र्थापनाको पक्षमा प्रतिकृयता दिइसकेका छन् । तर कांग्रेस र एमालेका कतिपय नेताहरु पुनस्र्थापनामा जान सकिँदैन भनेर अझै पनि भनिरहेका छन् ।
कांग्रेस नेता अर्जुननरसिंह केसीले संविधानसभा पुनःस्थापना भए लोकतन्त्र र स्वतन्त्र न्यायपालिकाको अपमान हुने बताउनुभएको छ । असफल भइसकेको संविधानसभा त्यही रुपमा पुनःस्थापना हुनै नसक्ने उहाँको जिकीर छ । यस्तै एमाले नेता भीम रावलले संविधानसभाको पुनःस्थापनाको कुरा छोडेर नयाँ चुनाबमा जानुपर्नेमा जोड दिनुभएको छ । उहाँले राष्ट्रपति मार्फत बाधा अडकाउ फुकाएर संविधानसभाको नयाँ निर्वाचन गर्नुको विकल्प नभएको बताउनुभयो । तर नेपाली कांग्रेसका अर्का नेता डाक्टर रामशरण महतले भने निर्वाचनका लागि पनि संविधानसभा पुनस्र्थापना गर्नुपर्ने बताउनु भएको छ । ‘अन्तरिम संविधानले नया निर्वाचनको परिकल्पना नै नगरेकोले अहिले देखिएको संबैधानिक संकट समाधानका लागि छोटो समयको लागि भएपनि संविधानसभा पुनस्र्थापना गर्नुपर्छ’ उहाँले भन्नुभयो । यस्तै एमाले उपाध्यक्ष बामदेव गौतमले विवादित विषयमा सहमति गरेर मात्र संविधानसभा पुनस्र्थापना गर्नुपर्ने बताउनुभएको छ । यसपछि मात्र संविधान घोषणा गरेर संसदको चुनावमा जान उपयुक्त हुने उहाँको भनाई छ ।
यस्तै माओवादीले छोटो अवधिका लागि संविधानसभा पुनःस्थापना गर्नुपर्ने बताएको छ । विगतमा जस्तो भत्ता खाने गरी लामो अवधिका लागि भने संविधानसभा ब्युँताउन नहुने प्रवक्ता अग्नी सापकोटाले बताउनुभयो ।
यसरी एउटै पार्टीभित्र पनि पुनस्र्थापना र चुनावबारे फरकफरक बुझाई छ । चुनावभन्दा पुनस्र्थापनाको पक्षमा मत थपिँदै गएपनि विकल्प कुन उपयुक्त हो भन्ने अझै प्रष्ट भैसकेको छैन । पार्टीभित्रै समान धारणा नबन्दासम्म दलहरुबीचको छलफलले यसबारे छिटै टुंगो लगाउने सम्भावना देखिँदैन ।
No comments:
Post a Comment
radijaljalanews@gmail.com