८ असोज, दमौली । पश्चिमाञ्चलको धार्मिक भ्रमणमा रहेका पूर्वराजा ज्ञानेन्द्र शाह सोमबार तनहुँको सदरमुकाम दमौली पुगे । उनले शिवपाञ्चयन मन्दिर र दुर्गा मन्दिरमा झण्डै ३० मिनेट पूजा अर्चना गरेका थिए ।
शिवपाञ्चायन मन्दिरमा पूजा अर्चना गरेपछि पूर्वराजा ज्ञानेन्द्रले जिल्ला विकास समिति तनहुँको अतिथी गृहमा समर्थकसंग भेटघाट गरेका थिए । भेटघाटका क्रममा राजावादीहरुले दलहरु असफल भएको भन्दै शासन सत्ता लिन अग्रसर हुनुपर्ने सुझाव दिएका थिए । राजावादीहरुले सुझाव ध्यानपुर्वक सुनेका पूर्वराजाले कुनै प्रतिक्रया भने नजनाएको भेटमा सहभागी हरुले बताएका छन् ।
त्यस्तै पत्रकारहरुसंग भेटघाट गरेको भएपनि उनले खुलेर कुराकानी गरेनन् । एकतर्फी आफ्नो धारणा राखेका पूर्वराजा ज्ञानेन्द्रले सर्वसाधारणलाई जस्तै आफूलाई पनि देशको चिन्ता लागेको बताए । मुलुकको वर्तमान परिस्थितीमा सबैलाई जग जाहेर भएको उनले बताए ।
राजतन्त्र फर्कने कत्तिको सम्भावना छ भनि संचारकर्मीहरुले राखेको जिज्ञासामा पूर्वराजा ज्ञानेन्द्रले कुनै प्रतिक्रिया दिएका थिएनन् । उनले आफ्नो भ्रमण सफल बनाउन सहयोग गरेकोमा सबैलाई धन्यवाद दिएका थिए ।
यस अघि पूर्व राजा ज्ञानेन्द्र मन्दिर दर्शनका लागि दिउँसो ३ बजे दमौली आउँदा दमौलीको मुख्य चोकमा स्वागत समारोह समितिका संयोजक गोपाल खनाल, शाहीकालका मन्त्री दुर्गा श्रेष्ठ लगायत सर्वसाधारणले फूलगुच्छाले स्वागत गरेका थिए । उनीहरुले राजतन्त्रको पक्षमा नाराबाजी गरेका थिए । पूर्वराजाको स्वागतका लागि दमौलीको मुख्य चोकदेखि अनसनचोकसम्म सर्वसाधारणको भीड लागेको थियो । पूर्वराजाको भ्रमणमा शिवसेनाले पोखरादेखि स्कटिङ गरेको थियो ।
No comments:
Post a Comment
radijaljalanews@gmail.com