२१ असोज, काठमाण्डौ । दश बर्षसम्म जनयुद्ध लडेका माओवादीका पूर्व लडाकू कमाण्डरहरु आजदेखि औपचारिक रुपमा नेपाली सेनाको अधिकृतमा नियुक्त भएका छन् ।
अधिकृतमा छानिएका ७१ लडाकूलाई आज नेपाली सेनाले ४५ दिने घर बिदामा पठाउँदै छ । दशैं-तिहार मनाएर ४५ दिनपछि र्फकने उनीहरु १२ महिने अधिकृत तालिममा सहभागी हुनेछन् ।
लडाकू कमाण्डरहरुको अधिकृतका रुपमा सेनामा प्रवेशसँगै ६ बर्षदेखि जारी शान्ति प्रकृया औपचारिक रुपमा टुंगिएको छ भने २०५२ सालदेखि जारी एक मुलुक दुई सेनाको अबस्था पनि औपचारिकरुपमा अन्त्य भएको छ ।
लडाकूबाट छानिएका अधिकृतहरुले नेपाली सेनाको चेन अफ कमाण्ड अन्र्तगत तालिममा सहभागी हुनेछन भने तालिमपछि नेपाली सेना अन्र्तगत गठन हुने महानिर्देशनालयमा रहने छन् । समायोजनमा जाने लडाकूको संख्या कम भएका कारण महनिर्देशनालय गठन हुने/नहुने बिषयमा भने अहिले पनि अन्यौल छ ।
छानिएका ७१ अधिकृतलाई बिशेष समिति सदस्यहरुले शुक्रबार सैनिक आवासीय महाबिद्यालय पुगेर बधाई दिएका थिए । लोक सेवा आयोग र नेपाली सेनाका प्रतिनिधि सम्मिलित छनौट समितिले आजै छानिएका ७१ लडाकूको नामावली प्रकाशन गर्ने छ ।
यसअघि अधिकृतभन्दा तल्लो तहमा १ हजार ३ सय ८८ लडाकूहरु छानिइसकेका छन् । छनौटपछि उनीहरुलाई पनि नेपाली सेनाले तलवसहित ४५ दिने घर बिदामा पठाएको छ । घर बिदाबाट फर्किएपछि उनीहरु ७ महिने तालिममा सहभागी हुनेछन् ।
No comments:
Post a Comment
radijaljalanews@gmail.com